木偶奇遇記

  想搵動畫電影嘅話，請睇木偶奇遇記 (電影)。

呢幅插畫描繪嘅，係《木偶奇遇記》嘅主角皮諾曹。

《木偶奇遇記》（意大利文：Le avventure di Pinocchio），要貼近返原著個呔圖嘅話可以譯做《皮諾曹嘅冒險》，係個好出名嘅童話故仔。原著係一本 1881 年出版嘅兒童奇幻長篇小說，有 36 個章節。呢本書嘅作者係意大利作家卡勞·科洛迪。

故仔嘅主角係一個叫皮諾曹嘅木造扯線公仔。皮諾曹嘅創造者係個年老木雕師，呢個木雕師當正皮諾曹係仔噉。初頭，皮諾曹好曳成日講大話同惡作劇，為佢養父帶嚟咗唔少麻煩，不過後嚟佢經歷漫長嘅旅程，變咗個又勇敢又孝順又有責任心嘅細路，最後得以得到血肉嘅軀體，成為一個「真正嘅男仔」。

個名

《木偶奇遇記》喺各語言入面嘅名如下：

• 意大利文：Le avventure di Pinocchio —就噉字面解嘅意思係皮諾曹嘅冒險。
• 英文：The Adventures of Pinocchio —都係皮諾曹嘅冒險噉解。
• 德文：Die Abenteuer von Pinocchio —皮諾曹嘅冒險。
• 法文：Les Aventures de Pinocchio —皮諾曹嘅冒險。
• 日本話：Pinokkio no bōken；用假名加漢字寫係「ピノッキオの冒険」—意思貼近原著呔圖，係皮諾曹嘅冒險噉嘅意思。
• 韓國話：Pinokioui moheomn；用諺文寫係「피노키오의 모험」—字面上都係皮諾曹嘅冒險噉解。
• 標準中文譯名：木偶奇遇記；
  • 標準官話：mù ǒu qí yù jì
  • 粵音：muk6 ngau5 kei4 jyu6 gei3
  • 對於呢個呔圖，一般嘅理解係「木公仔（嘅）神奇遭遇（嘅）記述」嘅意思。
• 或者粵文：皮諾曹嘅冒險；
  • 粵音：pei4 nok6 cou4 ge3 mou6 him2

人物

《木偶奇遇記》主要有以下呢啲人物mat2，按出場次序排先後：

• 安東尼奧師傅：一位年老嘅鬭dau3木師傅，出晒名個鼻紅扑扑、好似車厘子噉色，所以畀人改咗個花名叫車厘子師傅；最後會被雕成皮諾曹嗰嚿木，就係由安東尼奧師傅發現嘅。
• 傑啤佗pe1 to4：一位年老嘅窮木雕師，亦係皮諾曹嘅創造者，皮諾曹當正咗傑啤佗係佢阿爸；喺外形上，傑啤佗最大嘅特徵係戴住好似粟米咁黃嘅假髮，畀鎮上嘅細路改咗個花名叫粟米糊；傑啤佗好唔中意呢個外號。
• 皮諾曹，跟英文個讀音嚟音譯可作皮諾奇奧：由傑啤佗造嘅一個木扯線公仔，造型同心境上都係個細路仔；傑啤佗當正皮諾曹係親生骨肉噉；皮諾曹初頭好曳成日掛住玩，屢次做出錯誤決定惹禍上身，仲為傑啤佗帶嚟唔少麻煩，不過後嚟皮諾曹經歷漫長嘅角色發展，成為一個又勇敢又孝順又有責任心嘅細路，而藍仙子最後亦畀皮諾曹達成心願，施法將佢變成一個有血肉之軀嘅「真正男仔」。
• 識講嘢嘅蟋蟀
• 頭髮綠松色嘅仙子，要簡短啲嘅可以稱佢為藍仙子：一位有綠松色頭髮嘅仙子，女性，喺故仔途中多次出手幫助皮諾曹；佢有陣時仲會扮演好似養母噉嘅角色，照料皮諾曹；故仔去到最後，藍仙子見到皮諾曹個性格變好咗咁多，就施法賦與血肉軀體畀佢。

情節

《木偶奇遇記》嘅情節，大致上係噉嘅：

皮諾曹嘅誕生

章節：1-3

話說喺好耐好耐以前有嚿木頭。有一日，鬭木師傅安東尼奧發現咗嚿木，覺得佢質地幾靚，就將佢攞咗返工作室，點知佢攞起架生一嘢鑿嚿木，就聽到把細路嘅聲：

「呀！唔好整痛我！」

安東尼奧當堂嚇到冇咗半條命咁滯。下一刻，佢聽到有人敲門—佢嘅朋友木雕師傑啤佗嚟咗搵佢。

「呀... 傑啤佗，你搵我有咩貴幹？」

「係噉嘅，我有個諗頭，想搵嚿木整個扯線公仔，用公仔嚟表演賺錢。」

嚿怪木答嘴：「條計仔幾正喎，bravo！」

安東尼奧決定將嚿怪木送走。於是傑啤佗就攞咗嚿怪木返屋企。

插圖：安東尼奧畀嚿怪木嚇到目定口呆。 插圖：安東尼奧畀嚿怪木嚇到目定口呆。  插圖：傑啤佗攞住嚿怪木行返屋企。 插圖：傑啤佗攞住嚿怪木行返屋企。  插圖：傑啤佗將嚿怪木雕成扯線公仔。 插圖：傑啤佗將嚿怪木雕成扯線公仔。

傑啤佗一返到屋企就郁手，將嚿怪木雕成一個男仔噉形嘅扯線公仔。佢一路雕，一路仲諗同個公仔改名：

「吖，我記得我識好幾個有錢又好運嘅人，都係叫皮諾曹嘅，一於嗌你做『皮諾曹』啦！」

—傑啤佗當咗皮諾曹係仔噉。點知佢一雕好，皮諾曹就有咁快得咁快跑咗出街，仲跑得好快。傑啤佗追上去，大嗌叫啲街坊幫手追，但係啲街坊個個掛住望識郁嘅木公仔，完全忽略追到喘晒氣嘅傑啤佗。起咗輪鬨之後，終於有個差人行過。佢身手好過傑啤佗，一嘢就捉住皮諾曹。然後就有個街坊大聲插嘴：

「傑啤佗九成係成日虐打個公仔，先搞到佢要走佬！」

差人又真係信呢個街坊講嘅嘢，以「懷疑傑啤佗虐待細路」做理由，拉咗傑啤佗返牢房。當晚，傑啤佗坐喺凍冰冰嘅牢房入面，呻san3：

「正衰仔！早知雕嚿叉燒好過雕你！」

插圖：皮諾曹跑得好快。 插圖：皮諾曹跑得好快。  插圖：差人一手捉住皮諾曹。 插圖：差人一手捉住皮諾曹。

百厭嘅皮諾曹

章節：4-8

傑啤佗畀差人帶咗去牢房，冇皇管嘅皮諾曹四圍去玩，玩足成日先返屋企。佢返到屋企鎖埋門，就見到牆上有隻好大嘅蟋蟀，隻蟋蟀識講嘢：

「我係識講嘢嘅蟋蟀，我喺呢間屋住咗上百年咁耐喇。細路，等我講樣道理你聽，好似你咁百厭，大個咗一定會後悔。」

「是但啦！橫掂我都諗住走！我留喺度佢哋遲早會叫我好似其他細路噉返學！」

「噉嘅話你必定會變成一隻驢，成為所有人嘅笑柄。」

講講吓，皮諾曹覺煩，想隻蟋蟀收聲，於是佢就隨手攞起個槌仔，一嘢掟向隻蟋蟀，點知掟中，仲掟死咗隻蟋蟀。

過咗冇耐，天開始黑，皮諾曹一個人喺屋企覺得肚餓，但係傑啤佗又唔喺度，佢就唯有夜嗎嗎走出街想搵嘢食。皮諾曹是但搵咗個鄰居，上前去敲門問對方可唔可以施捨少少麵包。屋入面個阿伯心諗：

「咁夜走嚟敲門，九成係嗰啲夜晚四圍去惡作劇嘅衰仔。」

阿伯打開窗，攞一盤冰凍嘅水嚟淋落皮諾曹身上。皮諾曹搞到成身濕立立，只有死死哋氣噉返屋企。一返到，佢第一時間就係坐喺火爐前面想取暖，仲將對腳板擺喺個爐上面，然後佢就睏著咗。皮諾曹唔知嘅係，佢睏著嗰陣腳板畀爐焫laat3著咗，仲慢慢燒到變咗灰。

朝頭早，傑啤佗返到嚟。傑啤佗一入屋，見到冇咗腳板嘅皮諾曹就覺心痛，皮諾曹亦喊晒口噉應承以後會乖，於是傑啤佗就幫皮諾曹整新腳。整好之後，傑啤佗幫皮諾曹打扮到好似一位小紳士噉，然後安排皮諾曹聽日去返學，途中佢為咗幫皮諾曹買書而賣咗自己件褸。

插圖：皮諾曹攞槌仔掟隻蟋蟀。 插圖：皮諾曹攞槌仔掟隻蟋蟀。  插圖：皮諾曹冇咗腳板，企唔到起身開門；傑啤佗焗住要由窗口爬入屋。 插圖：皮諾曹冇咗腳板，企唔到起身開門；傑啤佗焗住要由窗口爬入屋。  插圖：傑啤佗幫皮諾曹整新腳板，仲幫佢著返件靚衫同戴返頂帽。 插圖：傑啤佗幫皮諾曹整新腳板，仲幫佢著返件靚衫同戴返頂帽。

橋段

睇埋：童話

影響

睇埋：木偶奇遇記 (電影)

外拎

• The Adventures of Pinocchio （英文），《皮諾曹嘅冒險》英文譯版嘅 PDF 快勞。
• 木造嘅男仔（木偶奇遇記戲仿） （英文），一個《木偶奇遇記》恐怖版本（唔啱細路睇嘅）。