度 (天文)

度，華夏天文嘅量天單位，以經緯度星位。古人計算，日在天行一日一度，一周即一年，一共三百六十五度又四分度之一。然而留意，今西度圓一周為三百六十度唔同。喺西洋天文來華之前，天文都係三百六十五度四分度之一咁計。

古時唔興小數，而用分數。若有分數，就以幾度幾分度之幾咁寫法。

報天星位置時，天球赤經以二十八宿距星經度，赤緯以距天球北極緯度。例如亢一度，去極三十度。另外〇叫做初，如牽牛初度。

西度實質出自巴比倫後尾創造嘅理想天文曆法，一年有十二月，一月卅日，咁有三百六十日，周天三百六十度，一日一度。同華夏諗法差唔多。此曆法不過天文學家嘅理想，唔用喺生活，巴比倫人用陰陽曆。古希臘喺紀元前二世紀，借用於幾何。

字義

古人講度，度長短咁意 ，亦即度量衡個度。而量天以量天尺度，故此叫度。

西洋來華之後，凡英文degree之意都用咗依個度。

記載

據漢時所寫淮南子天文所講，「太微者、主朱雀、紫宮執斗而左旋、日行一度、以周於天、日冬至峻狼之山、日移一度、凡行百八十二度八分度之五、而夏至牛首之山、反覆三百六十五度四分度之一而成一歲。」

天上嘅日，喺天球上行一日，就叫一度。平均一年有三百六十五又四分之一日，就即係日喺天行咗三百六十五度又四分度之一，半年就一百八十二度又八分度之五，一季九十一度十六分度之五。

二十八宿

古時經度以二十八宿配度計。

淮南子天文咁分配度數，「星分度、角十二、亢九、氐十五、房五、心五、尾十八、箕十一四分一、斗二十六、牽牛八、須女十二、虛十、危十七、營室十六、東壁九、奎十六、婁十二、胃十四、昴十一、畢十六、觜嶲二、參九、東井三十三、輿鬼四、柳十五、星七、張、翼各十八、軫十七、凡二十八宿也。」

其他星經度，就以各宿距星，距幾多度計。例如寫做牽牛初度、牽牛一度咁。初度即〇咁解。

去極

星嘅緯度，以離天球北極幾多度計算，亦即去極度。由於去極度只有半圓度，亦即只有初度至到一百八十二度又八分度之五。天球赤道為去極九十一度十六分度之五。