奥斯曼帝国
奥斯曼帝国（古土耳其语: دَوْلَتِ عَلِيّهٔ عُثمَانِیّه Devlet-i Aliyye-i Osmâniyye, 今土耳其语: Osmanlı İmparatorluğu or Osmanlı Devleti）是13世纪末立在小亚细亚发源，以突厥人作为统治集团，并混合交关其他族群辅助统治个伊斯兰帝国。迭个国家灭脱拜占庭帝国之后，又拿到哈里发头衔，以罗马帝国搭阿拉伯帝国个继承人自居。伊拉发明个人海战术对付欧洲辰光老有优势，立在14-16世纪多趟击败欧洲人，占领巴尔干半岛并灭脱匈牙利王国。两趟围困维也纳，奥斯曼帝国贩卖斯拉夫人，并鼓励阿尔及尔海盗抓欧洲人为奴隶。同时又吸纳基督徒少年作为血贡加入伊拉个苏丹禁卫军，成为帝国个官僚。立在17世纪之后，迭个国家国力下降，故步自封。对外战争几乎趟趟失败，国土弗断缩小。19世纪20年代，希腊从奥斯曼帝国独立，之后，东欧其他民族也一个个成功独立出去。同时，北非畀欧洲列强瓜分，帝国势力大幅度缩小。立在黑海沿岸，俄罗斯帝国步步逼近，并立在1877年兵临奥斯曼帝国首都。个辰光，迭个国家只有依靠英国人个保护才勉强维持。到20世纪开始辰光，奥斯曼帝国开始模仿欧洲，实行国族主义，对境内个希腊人、亚述人、亚美尼亚人残暴屠杀，总共杀脱超过200万基督徒，罪行累累。1914年，奥斯曼帝国参与同盟国组织，想通过战争获得利益，弗过大败，1918年列强进入小亚细亚，之后，凯末尔虽然击退外国干涉，弗过也宣布拿奥斯曼苏丹废脱，到1922年，奥斯曼帝国终结。