Ordinaat

2D Karteesch Koordinatensystem mit’n poor Bispeel-Punkten.

Ordinaat is en Begreep ut de Mathematik, nipp un nau seggt ut de analytischen Geometrie.

As Ordinaat warrt in en Karteesch Koordinatensystem de y-Ass betekend, de pielliek op de Abszisse steiht. In den eenfachsten Fall vun so en Koordinatensystem sünd de beiden die eenzigen Ass, de dat Koordinatenkrüüz opspannen doot. Se sniedt sik in den Oorsprung, woneem beid den Weert Null hebbt.

De Begreep Ordinaat warrt dorbi eenmol för de y-Ass sülvst bruukt, togliek is dormit aver ok de Assenafsnitt meent, de den Weert vun een sünnern Punkt in dat System weddergifft. In de Afbillen sünd dat de strekelten Lienen, de parallel to de y-Ass leegt.