Urs Eggeschwyler

Der Urs Eggeschwyler (* 24. Jänner 1849 z Subingen; † 8. Dezämber 1923 z Züri) isch e Schwiizer Künschtler gsy.

Läbe

Der Eggeschwyler het z Subinge d Volchsschuel bsuecht und drno bim Joseph Pfluger d Lehr als Bildhauer gmacht. 1869 het er bim Heinrich Spiess z Züri chönne schaffe, und denn isch er uf Münche a d Kunschtakademy ggange. S Moole und Modelliere het er sech deils sälber byprocht.

Sit 1878 isch dr Eggeschyler wider z Züri gsy. Er het Sache für d Zürcher Zöift gmacht, und denn het er mit Löieskulptuure agfange. Er het drfüür läbigi Dier gha, won er z Züri in ere eigete Menaschery ghalte het. Me het ne us verschidene Länder gärn z Hilf grueffe, wenn e Diergarte künschtlechi Felse für d Diergheeg bruucht het.

Z Züri gseht me no hüt em Eggeschwyler syni Löiefiguure uf de Süüle bi dr Stauffacherbrugg und bim Hafe Ängi. S Grab vom Künschtler isch im Zürcher Fridhof Nordhäim.

Literatur

• Museum Solothurn: Urs Eggenschwyler (Katalog für d Uusstellig ane 1978)

Weblink

• Tapan Bhattacharya: Eggenschwiler [Eggenschwyler], Urs. In: Historisches Lexikon vo dr Schwiiz.
• Eggenschwyler, Urs. In: Sikart (Lexikon un Datebank zue dr Chunscht in dr Schwyz un im Firschtetum Liechtestei).