Morosament
|
Quest articol chì l'è scrivud in lombard, con la Noeuva Ortografia Lombarda |
El morosament a l’è un period de temp che el va de quand dò persone se fann la cort a quand se mariden. Ind el cors de quella fas chì, a gh’è de norma una parposta de mariozz che la mena la cobia a meter sgiò una data de zelebrazzion per l’isposalizzi. Quand che dò persone inn ind una situazzion de morosament, ghe se dis “moros”. De solet, el temp che ghe passa de la parposta a l’isposalizzi efetiv el muda de cas a cas, e el depend soratut di norme colturai de la sozzietaa che i duu moros ghe viven denter.
Di morosament bei longh eren una vœulta comun ind i mariozz binad, indova i sgent di duu moros je binaven insema anca se eren ancamò di bagaj o, infinamai, inanz del sò nassiment.[1] Quell costum chì el seguta a indà inanz ind un monton de pais infinanca al dì de incœu. Storegament, i morosament intra dò persone eren dei afari de una bella importanza sozzial che ciamaven l’atenzion di member di fameje di duu moros per riessì a marossàj e tràj in pee debon. La scerna de chi maridà l’era donca un quajcoss che el ghe pertocava ai duu moros nomà de rara.[2]
Ind un frach de denomenazzion cristiane es pœul anca fà su di rit de morosament, indova che s’esprim l’intenzion de maridàss in gesa denanz a un prevet e es rezzev una benedizzion piscinina.[3]
Referenze
[Modifega | modifica 'l sorgent]- ↑ Treccani
- ↑ Britannica
- ↑ The Order of Blessing an Engaged Couple (English). Liturgy Office: England & Wales (2010).
Ligam de denter
[Modifega | modifica 'l sorgent]Ligam de fœura
[Modifega | modifica 'l sorgent]
Wikimedia Commons el gh'ha dent imagin o alter archivi su morosament