舊石器時代

史前時代
全 新 世	鐵器時代			原史時代
	青銅時代晚期		青 銅 時 代
	青銅時代中期
	青銅時代初期
	銅石並用時代
	新石器時代		石 器 時 代	史前史
	中石器時代／亞舊石器時代
更 新 世	舊石器時代晚期	舊 石 器 時 代
	舊石器時代中期
	舊石器時代初期

 舊石器時代（粵拼：gau6 sek6 hei3 si4 doi6） （英文：Paleolithic Age）係人類文明（包括巧人等人科生物）發展嘅最初期，屬史前時代，呢段時期人嘅工具主要係用石頭整嘅，亦即係石器（打製石器），係石器時代嘅早期階段。基本上，佢佔到幾乎地球上全部嘅人類歷史，時間上劃定為260萬年前或250萬年前（人首次製出石器），出現咗由各種原始人類如能人（Homo habilis）整出嘅石製工具，直到1.2萬年前（產生農耕，全新世）。對應到地質年代屬於上新世晚期更新世。傳統上，舊石器時代三分為早、中、晚期，呢啲時期標誌住原始人類社會嘅工藝、文化嘅進步。對舊石器時代人類生活嘅知識源自考古發掘、以及人類學對現存一啲部落嘅研究。舊石器時代嘅名出自希臘文，由παλαιός（palaios，意思係古、舊）加λίθος（lithos，意思係石）構詞，得出英文術語Paleolithic，由考古學家莊·拉北喺1865年造出。

海德堡人嘅頭骨，屬舊石器時代初期嘅人，係尼安德特人嘅祖先，年代喺前50萬年前到前40萬年前

舊石器時代結束喺中石器時代（Mesolithic）開始時，或者喺各區域出現新石器化嘅過程，打開咗亞舊石器時代（Epipaleolithic）。舊石器時代嘅特徵係使用打製石器，雖然嗰段時間嘅原始人亦使用木製、骨製工具。源自有機嘅產品亦使用做工具，包括皮、植物纖維，不過呢啲類型嘅工具未得傳世程度嘅保存。

時代區分

區分法

通常，舊石器時代區分爲以下三種。

1. 前期舊石器時代
   • 用手工嘅時代。呢個時代嘅人類以能人同直立人爲主流。
2. 中期舊石器時代
   • 剝片石器出現嘅時代。
   • 尼安德特人廣泛分佈。從極東亞洲嘅中期石器文化嘅特徵睇，唔會係來自歐洲嘅尼安德特人，可能性比較大嘅係從亞洲原人進化出嘅古代型新人所形成嘅文化。
3. 後期舊石器時代
   • 石器急速高度化、多樣化嘅時代。呢種技術革新嘅原動力有講法係語言發展嘅結果。克羅馬儂人（智人）成爲主流，其他化石人類急速消失。

人學識製造工具

人進化自類人猿，關於人嘅起源，有非洲起源說——人發源自非洲，然後遷徙到其他大洲，亦有話人係多地獨自起源同進化嘅，但無論如何，人之所以可以遍佈全世界，從熱帶雨林到北極雪地，在於人有智力，可以運用材料、工具令自己適應當地環境，唔使進化，甚至可以改變環境來適應自己。

人學識製造工具，係人類文明開端，係地球歷史飛躍，因為之前係睇生物基因適唔適應到環境變化，而家就係人類活動改變生存狀況。

當時嘅人發明咗石刀技術，從石心壓制出長而鋒利嘅薄片作為石刀，用嚟整其他材質嘅工具，以及製作工具嘅工具。其他材質可以係獸骨、木頭。

發明

據考古出土，當時製作出嘅工具有長矛等武器，亦都有好似刮刀等加工器。當時嘅人識得運用拋射現象，於是識得喺繩頭綁嚿大石去捉野牛等動物，亦都發明咗投石器、投茅器、弓箭等拋射工具。呢啲發明初時好粗糙，但後來不斷改進，就成為火器發明之前威力最大嘅冷兵器。

舊石器時代晚期有其他發明，比如用骨、象牙整嘅錐、針、扣，甚至有鈕，即係話人學識咗整合身嘅衫。雖然舊石器晚期嘅技術發展得比100萬年前嘅初期進步好多，但依然好原始。

社會

嗰陣時嘅社會主要係部落，重未產生有專職領導嘅政治機構。啲部落大多係自治，以血緣關係成為一族，估計啲部落人口20到50人左右，因為未有農業，食物係源自採集、狩獵等，所以養得人唔多，不過如果一個地方食物來源豐富嘅話，部落人口就多啲。

當時未產生政治，雖然有阿頭，不過阿頭權力唔大，當時未有由制度確立、眾人公認嘅強制權力，啲人未能將個人或集體意志強加他人。啲阿頭嘅產生源於部落需要：識拜祭儀式嘅老人成為司儀，狩獵能力高強嘅後生做狩獵隊長。領袖唔係用權力，而用自身影響去完成職責。

當時人同人嘅關係好親密，因為部落內都係親戚，有咩事都會互相照應。同時人同人之間完全平等，每個人都有公認嘅義務同報酬。雖然無人確定到自己前景，但並冇因此憂慮或者彼此疏遠。舊石器時代嘅人可以成為「完全嘅人」，而且完全程度係自農業產生後未曾接近過嘅（相對到現代，就有哲學所講嘅「人嘅異化」）。

部落之間可能會因為個人世仇或者爭地盤而有打鬥，不過因為舊石器時代生產水平低，而戰爭需要物力人力投入，所以當時打鬥規模唔大，直到後來農業產生，大規模戰亂先至出現。

兩性關係

當時係有一夫多妻，不過極少。呢段時期嘅兩性關係比之後任何時候平等。原因係男人同女人對部落嘅貢獻係同等嘅：男人負責狩獵、保衛，而女人生兒養女，並提供大部份食物——男人狩獵嘅肉食固然好好，但大部份食物來自女人喺部落附近採集嘅蔬菜瓜果、易捉嘅小動物。而之後農業出現，男人因為好力成為耕作等生產嘅主要勞力，於是女人因為貢獻唔對等逐漸成為「第二性」。

飲食

今時今日，人對舊石器時代人類飲食嘅認識來自對人屎化石嘅研究同現存部落食嘅嘢。

嗰時人類食嘅嘢種類非常之多，可以講係乜都食，食得就食，包括現代人覺得核突嘅嘢，比如曱甴等蟲類。而佢哋對住嘅周邊極其熟悉，知道附近有咩種類嘅生物，邊啲食得，邊啲有毒，邊啲有除食用價值外嘅其他用處（如醫藥等）。

正因為乜都食，所以好難有饑荒，唔似得農業後嘅人類，因為農業中嘅作物、牲畜相比原始人食嘅品種少好多，一旦遇災，失收減產，就有饑荒之虞，而原始人食嘅嘢類型太多，好難話咁多品種嘅事物同時欠缺。災年中農民去挖樹根樹皮、食野外動物等捱過饑荒，就係學似原始時代人嘅飲食。

世界觀同宗教

原始人對世界嘅睇法係世界唔會變，過去同將來一樣，冇發展概念，亦唔會質疑現有規矩、習俗。原始人覺得，天地萬物，包括佢自身、佢哋嘅文化以及住所，都係一早就創造出來，而且肯定會一成不變延續到無窮未來。睇下各民族創世神話，就會發覺有一個共同點：一切都搞掂曬，先人定落規矩、教落技藝。比如中國有神農嘗百草、倉頡造字；聖經話一切嘢都喺上帝創世時定好曬。

原始人對周邊非常瞭解，但佢哋對自然界嘅情況係知其然而不知所以然，一遇到如洪水、旱災等就唔知咩緣由，就寄託於超自然。所以原始部落巫術風行，認為巫師有超自然能力，可以消災化難；獻祭儀式亦好多，以為可以祈求超自然為佢哋轉運；圖騰崇拜，以為以某種動植物或者神物做偶像就可以化兇。

因為舊石器時代生產水平低，日後等級森嚴嘅僧侶集團都供養唔起，所以未產生可以凝聚社會嘅神學，宗教未作為一種控制社會嘅工具。啲人對神嘅概念蒙查查，比較多係私人幻想。

藝術

嗰時嘅藝術主要係岩洞壁畫。內容大多係狩獵場面。有一個現象，亦同啲人嘅迷信相關：原始人一般住山窿口附近，但啲壁畫大多畫喺山窿深處，最暗最危險嘅地方，往往唔同嘅畫作相互重疊，亦就係話，畫畫人未諗過要保存作品。對此解釋係，啲人畫畫，係覺得山窿深處有超自然力，畫啲狩獵場面就有幫助狩獵嘅魔力。相當於家下嘅許願樹。

歷史遺產

雖然話舊石器時代好原始，但奠定咗人類文明嘅基石。舊石器時代人類獲得嘅知識至今係基本知識乃至係生活所需嘅常識。實際上原始人嘅知識就已經非常豐富，比如對居地瞭如指掌、對動植物品種及利用價值嘅知識、製作使用工具嘅知識等等。

嗰時已經奠定今日嘅烹調技術，比如原始人識用火灶、用石板燒烤、極地嘅寒冷可以保存食物、其他地方可以用風乾或者用油脂保存食材等。實際上，舊石器時代嘅人來到現代，除咗諸如煤氣、電器等現代工具，廚房嘅嘢佢都會好熟悉。

醫藥上亦累積唔少，雖然有時啲人以為巫術可以醫病，但醫療技術都識啲，比如曉得夾板可以續斷肢、識得用止血帶繃帶敷藥、知道灌腸同放血係療術。

乃至原始人識得天文，可以劃分星座。波利尼西亞人嗰時已掌握航海，借此遷徙到太平洋各島。

落後同轉型

雖然舊石器時代嘅社會人際關係好親密，但亦好壓抑人。個人完全聽命於部落。部落睇成係一條無窮無盡嘅隊伍，隊伍由死者、生者、未降世者組成，受神靈福佑。個人完全屬於呢條隊伍，雖然話啲人唔覺得自己嘅人生綁住喺上面，覺得自己係參加咗條隊，不過正因為噉，令舊石器時代發展緩滯————啲人唔諗住改變一切，唔反傳統。實際上一啲部落會殺死唔按傳統生活嘅人。

不但殺死反傳統嘅人，喺食物短缺時，會殺嬰、老人、孱人。無部落可以永久據於一地，始終食物有限，而人口會增長，於是就要遷徙，因此為咗遷徙就要削減。人口增長亦緩慢，因為環境嘅人口承載量好有限，當時人口密度每平方公里先得一個人。

所以舊石器時代後，農業出現，進入新石器時代，好快農業生產就取代咗狩獵採集嘅生活方式，今日得返無法開展農業嘅地方依然保留原始生活。因為農業生產食物可以養更多人，而為咗養更多人，就要開更多耕地，於是就會去原始部落地區開荒，令原始部落接觸到並轉型到農業生活。

參考

• L.S.Stavrianos《全球通史》第7版上冊，北京大學出版社 ISBN 0-13-923897-2