Опат

Опат — титул старшого клаштора у дакотрых мужскых орденох. У женскых орденох подобну ролю мать опатиця. Во византийском обрядѣ тому одповѣдають титулы игумен, игуменя.

Опат и опатиця в традичном облечѣню

Атрибуты герба опата (злѣва) и опатицѣ

Етимология и значѣня

Слово опат походить з арамейского abbo, што означать духовного наставника, перебрано до латины яко abbas. В зачатку христианства то было лем учтиве ословѣня, пак честный титул, а од 6. стороча бенедиктины хоснують го на означѣня старшого монашой громады. Тыж таке значѣня прияли цистерциане, траписты, премонштраты. В иншых монашых орденах хоснують намѣсто того титулы приор, квардиан або ректор.

Выбраня до функции и юрисдикция

Опата выберать цѣла громада клаштора. Опатом може быти выбраный лем высвяченый на священника и старшый од 25 рокы монах. Зависимо од категории клаштора юрисдикцию выбраного мать потвердити Апостолска столиця (abbates exempti) або диецезный бискуп (abbates non exempti), котрым одповѣдно есть опат подрядженый. По потверджѣню нововыбраный доставать опатскы инсигнии: барлу, перстень и митру. Тоты може поуживати в литургии.

Опат есть суверенный рѣшати и судити во всѣх вопросах внуторного живота. Лем в дакотрых, напримѣр, продаж и накуп маетку, ся мусить радити з громадов. Опаты в церковной ерархии належать до прелатох, высокопоставленых священникох, мають право участи и голоса на церковных соборах.

Атрибуты герба

Опатскы атрибуты суть: широкый чорный клобук и дванадцять узликы або стряпкы по сторонах (гералдичны знакы прелата), а тыж вертикално поставена барла за щитом герба. На пантлику под гербом ся може написати опатске гасло. Опатицѣ не належать до прелатох, зато не мають одповѣдны атрибуты, намѣсто того мають пацеркы.

Иншы значѣня

Во Франции од 16. ст. ся вернули ку старому значѣню слова и хоснують титул abbé яко почтиве ословлѣня священника, котрый не мать нияку особенну функцию. То одповѣдать ословлѣню отче, панотче у грекокатоликох.

См. тыж

• Игумен
• Монашый орден

Жерела и одказы

• Podręczna Encyklopedia Kościelna (opracowana pod kierunkiem ks: ks Stan. Galla, Jana Niedzielskiego, Henr. Przczdzłeckiego, Ant. Szlagowskiego, Ant. Tauera i redaktora ks Zygm. Chelmlcklego). Tt. 29-30. Wydawnictwo biblioteki dzieł chrześcijańskich. Warszawa, 1913.
• Praelat. //Ottův slovník naučný, т.20