Dènemarken

Kerajaan Dènemarken Kongeriget Danmark (Dèn) Kongsríki Danmarkar (Perower) Kunngeqarfik Danmarki (Grunlan)
Ibu negeri	Kopenhagen
Nama pengendek	Dèn

Dènemarken (hurup Arab Gundul: دينمركن; Dèn: Danmark; Perower: Danmark; Grunlan: Danmarki) atawa resminya Kerajaan Dènemarken (hurup Arab Gundul: كراجأن دينمركن; Dèn: Kongeriget Danmark; Perower: Kongsríki Danmarkar; Grunlan: Kunngeqarfik Danmarki) entu ada atu negara bangsa Norden di Èropa Lor. Ni – negara nyang paling beludik deri antèronya negara-negara Skandinawi, beludiknya Norwèhen èn belah kidul-kulonnya Swèden (nyang dijuntrungin paké jembatan). Dia ada punya wates ama Dètslan di belah kidulnya, Laot Lor di blèlirnya, èn Laot Baltik di blètannya. Dènemarken entu negara bekembang dengen kesejahteraan nyang gedé. Selamanya tahon 2006 èn 2007, ni negara ada ditilik èn dikasi gelar "negara paling gumbira seantèro dunia" berales pakem kesèhatan, kesejahteraan, ama didikan.

Dènemarken punya ibu negeri namanya Kopenhagen, di pulo Sélan. Dènemarken entu negara kerajaan konstitusionil (artinya kepala negaranya entu raja nyang ada punya cuman sedikit kuasa) dengen atu orang ratu, nama Margarèta II (Margarethe II) deri Dènemarken. Dènemarken entu juga' negara parlemèntèr, artinya orang pada ngebenum parlemèn bakal ngeja beslit bakal dia pada, èn ada punya guwernemèn kera'yatan nyang dipimpin ama wajiralam kepili.

Letak géograpisnya, Dènemarken mah ada di daratan Èropa blèlir, di mana orang-orang Dènen pada tinggal. Adapun secara pulitiknya, Kerajaan Dènemarken juga menglingkup Pulo Perower di Laotan Atlantik, èn Grunlan di Amrik Lor. Ni tiga bagèan deri negara juga' ada punya dia punya basa ama budayanya sendèwèk-sendèwèk.

Adapun orang Dènemarken digero'nya orang Dèn (hurup Arab Gundul: اورڠ دين) atawa orang Dènen (hurup Arab Gundul: اورڠ دينن).