Linus (Bischof)

Hl. Linus, Reliquebischte, Auguschtinermuseum Friburg, 1782

Dr Linus (* in dr Toskana; † 79 z Rom (?)) isch wahrschyns vu 67 (?) bis 79 (?) Bischof vu Rom un dodermit villicht dr Noofolger vum Petrus gsii. In friechristlige Lischte wird dr Linus as erschte Papscht gnännt, erscht ab em spote 2. oder frieje 3. Johrhundert het sich d Uffassig duregsetzt, dr Petrus as erschte Papscht vu dr Chilche z nänne, un dr Linus dodermit as sy Noofolger un zweete Papscht.

Läbe

Dr Linus soll z Volterra in dr Toskana uf d Wält chuu syy. Iber sy Läben waißt mer fascht nyt, alli ihm zuegschribene Ufzaichnige si as Felschige oder Irrtimer erkännt wore. Dr Johann Heinrich Zedler het d e Claudia as Mueter vum Linus gnännt, e Herculeanus as Vater. Dr Linus sei vum Petrus zum Bischof ernännt wore. Dervor soll er bim Petrus Vikar gsii syy. D Aagabe zue syre Bischofszyt gehn stark uusenander. Di maischte Quälle leen si 67 aafange. Di katholisch Enzyklopedy haltet au 64 fir megli. Dr Liber Pontificalis nännt 56, dr Liberianisch Katalog 55, dr Eusebius von Caesarea 69. D Abwychig vu dr Date chunnt villicht doderhär, ass dr Linus em Petrus as Vikar dient het, wu dr Aposchtel no gläbt het, u nass e Dail Quälle sich uf die Zyt bezien.

Dr Linus isch elf bis 15 Johr lang Bischof vu Rom gsii, dr Liberianisch Katalog nännt zwelf Johr, vier Monet un zwelf Däg. Är isch anne 79 gstorbe no dr Mehzahl vu dr Quälle, 76, 23. Septämber 67 (Liber Pontificalis), 78 (Zedler) oder 81 (Eusebius). Di maischte Quälle – vor allem dr Lber Pontificalis, nit aber dr Irenäus vu Lyon – schrybe vun eme Märtyrerdod, wel zue dr Zyt vun sym Dod aber kai Chrischteverfolgig z Rom gnännt wird, halte des di maischte Hischtoriker fir ender uuwahrschynlig. Dr Tertullian nännt dr Clemens vu Rom as Noofolger vum Aposchtel Petrus, alli suschtige Quälle sin sich aber ainig, ass dr Linus dr diräkt Noofolger gsii isch, drotz ass si bi dr Date es vunenander abwyche.

Au di apokryphe latynische Bschrybige vu dr Dod vu dr Aposchtel Petrus un Paulus wäre felschligerwys em Linus zuegeschribe, stammen aber us em 6. Johrhundert. Dass er s Dekret verhänkt heeb, wu d Frau derno ihri Chepf in dr Chilche mien zuedecke, wird au aazwyflet. Syy Fyyrtig isch dr 23. Säptember, dr Dag vu sym Martyrium noch em Liber Pontificalis. Dr Irenäus het en mit däm Linus idäntifiziert, wu dr Paulus im 2. Brief vum Timotheus 4,21 nännt. Noch em Liber Pontificalis isch im Vatikan e Linus begrabe wore. Im 7. Johrhundert isch en Inschrift in dr Nechi vum Grab vum Aposchtel Petrus gfunde wore, wu s dr Name Linus dine gha heeb; do het s aber wahrschyns e Fähler bi dr Entzifferig gee.

Gedänkdag

Dr Linus isch e Hailige vu dr katholische Chilche. Sy Gedänkdag isch dr 23. Sptämber.

Literatur

• J. N. D. Kelly: Reclams Lexikon der Päpste. Reclam, ISBN 3-15-010588-9
• Ekkart Sauser: Linus. In: Biographisch-Bibliographisches Kirchenlexikon (BBKL). Band 5, Herzberg 1993, ISBN 3-88309-043-3, Sp. 98–100.
• M. Ziegler: Successio. Die Vorsteher der stadtrömischen Christengemeinde in den ersten beiden Jahrhunderten. Habelt, Bonn 2007, ISBN 978-3-7749-3496-2
• Ytrag in d Catholic Encyclopedia, Robert Appleton Company, New York 1913 (änglisch)

Weblink

 Commons: Linus – Sammlig vo Multimediadateie

• Ökumenisches Heiligenlexikon

Vorgänger Petrus

Bischof vu Rom ca. 67–79

Nochfolger Anaklet

Dä Artikel basiert uff ere fräie Übersetzig vu dere Version vum Artikel „Linus_(Bischof)“ vu de dütsche Wikipedia. E Liste vu de Autore un Versione isch do z finde.